用香港郵政搬運家當到英國

我想每一個要移居到英國的人, 都要面對兩個好基本既問題, 就是在英國住哪裡, 和怎樣把香港的東西搬到去英國.  很多人會隔山買牛, 或者至少預先越洋找代理去租樓, 因為都要有個地址, 才知可以把東西寄到哪裡.  而我太太因為工作原因而要提早先到英國, 所以找地方住的責任便落在她身上, 到她找到地方我便可以開始寄家當.

初初開始有人移居到英國時, 多數會租隻櫃, 但慢慢聽到的comment 好似麻麻, 什麼海鮮價, 又不定時, 去到又有額外寄存費等等... 而我們見自己好似要寄的東西"不多", 便選擇了用HK POST, 到最後我是大約寄了10隻M4盒和5隻M3盒.

TOR UIN

不過講點樣寄之前, 如果是用BNO VISA 移居到英國, 便一定要記得申請個TOR UIN 喇!  因為有了這個UIN 後, 寄幾貴的東西去英國也不用打稅, 方便很多的.

寄運方式

如果用HK POST 的話, 主要有三種形式 - SpeedPost (EMS), 暢運 (Vantage) 和平郵, 以下簡單地講下:

1. 平郵
   
   這個就即是坐船到英國喇, 最大吸引力的地方就是平.  如果我無記錯的話, 近30KG的也只需要約1千元港紙左右, 不過顯示出來既時間就要一至兩個月.  要看個人需要吧, 而我個case 就比較趕, 所以完全無考慮用平郵了.  如果真的要用平郵的話, 寄件時也要記住額外做好防潮準備, 箱內放些防潮珠比較好.
   
   好處: 平, 平, 平!
   
   壞處: 超慢......... 和要做防潮準備.
   
   
2. 暢運 (Vantage)
   
   這個暢運, 算快就黎比較平, 我覺得適合寄些唔係真係去到英國等住用的東西, 例如冬天時的夏天衫等等.  HK POST 頁面顯示它只需4-9 個工作天, 看上去跟speedpost 的2-7個工作天差不多, 以我的實際經驗, 暢運的速度上大約是speedpost 的一倍左右, 我大約等了八九個工作天才開始收到用暢運寄來的東西, 而價錢係speedpost 的2/3 左右.
   
   但要注意好似不是所有東西都可以用暢運寄.  我本身係用郵局買既箱去寄喇, 我有問過下郵局D 人, 他們說應該M3和M4箱都可以用暢運寄, 但到我在網上報關時, 卻發現無論幾重都好, 如果我用M4 箱係無暢運呢個選擇.  只有M3或以下既箱先有暢運揀.  所以如果要寄暢運的話, 便只可以用M3 這個size 或以下既盒.  而我最後只有那5 隻M3 可以寄到暢運.
   
   另外也要留意既係唔好寄D 太貴既野, 我其中有兩箱, 即使已有寫住TOR UIN, 但最後都照打左我稅先放行.  我估計因為呢個service 係同第三方合作, 因為平D, 所以expect 所有既野都係簡簡單單, 唔會同你做多D 野, 所以有疑似違禁品, 就會打回頭, D 野太貴, 咪照打稅唔會理你有無TOR.  所以我覺得這個最後就係用黎寄書, 衫褲等等呢D 肯定唔會係違禁品既野.
   
   好處: 價錢和速度方便最了個平衡, 十個八個工作天內到達算不錯.
   
   壞處: 不能用M4, 如果寄得多野要分開好多個箱.  不可寄太貴的東西, 只可以係寄些肯定唔會比人懷疑係違禁品既野.
   
   
3. Speedpost
   
   這個最大買點就當然是快喇, 事實上亦真的很快, 超出我的預期, 基本上3-4個工作天, 我便已經收到大部分用speedpost 寄的M4, 只有一個寫住"易碎", 和另一個受到特別"關顧"的要更長時間.
   
   當然, 一分錢, 一分貨, 它亦是最貴, 但亦較少麻煩.  我十隻M4 都是寄speedpost, 每隻都盡量計算個合理價錢, 有幾箱是寫超過一萬蚊港紙, 但最後沒有一隻M4被打稅, 所以我感覺上呢點都係speedpost 和暢運既分別.
   
   好處: 超快, 少麻煩, 可以用M4大盒
   
   壞處: 當然是價錢喇.

其實還有一個叫空郵包裹, 但價錢和speedpost 差不多, 但時間卻耐好多, 所以不談也吧.

Pack 箱

想好用咩辦法寄後, 便是開始pack 箱.  如果寄郵局的話, 用返郵局既箱會比較方便, 唔駛擔心size 既問題, 而且質素亦都幾好.  寄去英國最多應該只是30KG, 如果去到郵局過磅超過30KG 的話, 郵局既人便會立即叫你減磅, 所以最好就係去到郵局過左磅後先好封箱.  而我就去日本城買左個行李磅, M3 盒可以pack 完之後用綁行李既帶綁好個M3盒, 然後用行李磅成個吊起黎磅, 以我經驗就同係郵局磅差唔多, 有時我甚至封埋箱先運去郵局.  而M4盒就太大, 無工具可以把成個箱綁好再吊起, 而我就將入箱既東京分開磅, 至少都大約有個估算, 誤差亦都不會好大.  每個箱我都只會擺到最多九成重, 即是M3 我便放到18KG 到, M4就放到27KG 到, 因為如果去到郵局再執既話, 始終都係麻煩.

而如果用M4 的話, 便要好好利用佢既空間, 因為M4 真的很大, 只要放多幾件衫, 不用填滿箱子已經好易就到廿幾KG, 剩返出黎既空間, 可以放些紙品 (廁紙, 面紙, 等等)以作填滿, 一來英國既紙品真的很貴, 價錢是香港的double 有多, 二來亦都可以用些紙品來便下緩衝, 亦都以免箱內既物品在運送時周圍碌.

而到我去郵局寄時, 先發現原來寄東西是很麻煩的, 我成日比個郵差哥哥係度兇, 次次都話電池, 液體, 粉末, 有酒精成份, 危險物品等等都唔寄得, 如果有是有機會比人打回頭, 所以最後我好多野都唔夠膽搏, 例如屋企用既菜刀, 生果刀, 茶葉呢我都放棄左無寄過去, 洗頭水, 老婆D 護膚品化妝品等等呢D 又液體又粉末就有成功寄到, 不過呢D 我都唔夠膽放係暢運既包裹而係放係speedpost 度寄, 因為郵差哥哥話暢運會嚴謹好多.

如果有申請到TOR UIN 既話, 便記得係個箱上既四周都寫住自己個TOR UIN, 咁樣可以免打稅, 亦都無其他地方比你填呢個TOR UIN 既資料.

網上報關

Pack 好晒之後, 就可以在網上預先報關.

立即寄件 (hongkongpost.hk)

係填報關資料既時候, 最好就如實反映, 唔駛好仔細寫每一樣係咩野黎, 但至少要有個相關既大項目係度喇, 例如有衣服便寫有衣服, 有書便寫有書, 有化妝品便寫有化妝品, 我有用Tissue 填滿既話我就連Tissue 都有寫埋落去.  因為到最後, 我有一盒M4 係好遲先黎到, 黎到之後我發現佢係比人開過箱, 箱入面裝衫都比人界開晒, 應該係有人檢查過所以先遲左咁個幾星期先黎到.  而呢一箱既野因為唔係我執, 我只報左其中三種物品但其實裏面有五六種物品.  我不知道是否只是碰巧抽查, 但亦都合理懷疑和我報關的東西有出入而引起海關懷疑吧.

另外報關時有個特別既地方, 係香港呢邊要我地係每一個物品都要入埋個HS CODE.  我最初都一頭霧水, 後來上網看看應該係叫港貨協制編號.  呢個填起上黎有D 麻煩, 盡量可以係個名度打D keyword 睇下可唔可以自動chok 到個相關既HS CODE 出黎, 例如寄鞋, 可以就咁試下打個鞋字, 郵局網頁會自動嘗試幫你搵下, 搵到岩駛便可以揀果個code, 但我建議搵到個code 之後再改返你件物品既名, 因為搵到出黎既名多數都好奇怪.  不過好多時我都係搵唔到岩用的, 我就自己去政府統計處度搵, 果度會多好多選擇.

政府統計處 : 尋找貨物編號 (censtatd.gov.hk)

另外也可選擇買唔買保險喇, 基本上我每個箱都有買保險, 跟箱內物品既價錢去計算, 所以亦都係點解我會盡量計算個合理價錢.

報好關之後, 可以save 底個QR code, 到投寄時便有用了.  當時亦都可以自己把報關資料print 出來.

投寄

報好關, 有QR code, 便可以去郵局投寄了, 先過磅, 再封箱, 然後將個QR code 比郵局人員睇, 佢地就會幫你把相關資料print 出來貼係個箱度.  而係郵局可以用credit card 比錢, 如果大量投寄的話, 可以考慮開張新credit card 賺下迎新都好.

寄好之後, 保存好張單以便之後追蹤/跟進, 如果係寄speedpost 既話, 相信好快便可以送達.